Чекор по чекор

Од лежачи до атлетичари

Никогаш не е доцна да се почне. Марија почнала да трча на 68 години, по многу години главно поминати во седење. Таа со години незабележано се дебелеела дури и без да јаде многу, а тоа се случувало заради комбинацијата на традиционалната храна и неактивноста, што го покачило нејзиниот шеќер во крвта. Иако, не преку ноќ, таа на крајот успеала да го промени својот начин на живот и да постигне импресивни резултати. Со пообмислени навики за јадење, се ослободила од вишокот килограми и покачениот шеќер се вратил во нормала. Виталноста и доброто расположение заради трчањето ја потиснале едноличноста на секојдневниот живот исполнет со помали или поголеми здравствени проблеми.

Можеби си мислите дека овие случаи се многу чести. Камо среќа да беше така! Тоа би значело дека многу од нас се спремни да го подобрат своето здравје, без да се мачиме и да се чувствуваме мизерно. Скептиците можат сами да се уверат. Сега е лето, а раните утра се убави и не се премногу жешки. Што повеќе Ви треба да почнете со трчање? Не ви треба многу, еве неколку совети кои ќе ви помогнат да започнете.

Совети за тркачи-почетници

• Како прво, за редовно трчање ќе ви требаат квалитетни патики за трчање и чорапи кои нема да се туткаат во внатрешноста на патиките.
• Како и кај секое друго физичко вежбање, важно е постепено да го зголемувате темпото. Ако сте почетници, не се споредувајте со тркачите што Ве поминуваат како струја. Одредете свое темпо без да чувствувате притисок. Сепак, учете од искусните - набљудувајте што прават, па правете и Вие така.
• За секоја физичка активност се потребни најмалку 20 до 30 минути за да биде делотворна, што значи дека треба ефикасно да го користите времето. Започнете со пешачење, проследено со 1-2 минути трчање, па 1-2 минути одење и така наизменично. По првите една или две седмици, кога ќе добиете малку кондиција, може малку да го зголемите времето на трчање и да го намалите времето на одење. После 5-6 седмици редовно вежбање, ќе можете да трчате 15 до 20 минути без престан.
• Вежбајте разумно, онолку колку можете, не напнувајте до степен на истоштеност. Ако вежбате редовно, сами ќе почувствувате кога да го зголемите растојанието или брзината. Поентата е да продолжите да се движите постојано барем 20 до 30 минути на темпо кое Ви одговара.
• Важно е да се загревате пред секое почнување и да се оладите и да се растегнете отпосле за да избегнете повреди и болки во мускулите следниот ден.
• Неопходно е да пиете многу течности. Пијте течности половина час пред да трчате и земете малку вода со Вас за да ја надоместите изгубената течност на крајот на вежбањето.
• Препорачуваме да побарате информации за трчање на интернет, ќе најдете многу практични совети и добри програми за вежбање за почетници.
   

Нордиско пешачење - не е само забава за богатите

Сè почесто може да се забележат луѓе како пешачат во ритам и мавтаат со стапови слични на стаповите за скијање. Тоа е нордиско пешачење. Стаповите не ги користат само за поддршка, туку и како важни додатоци со кои се поттурнуваат во оваа интензивна форма на вежбање што навистина ве тера да го раздвижите секој дел од Вашето тело.

Горазд бил во своите педесетти години кога почнал со нордиско пешачење. Лекарите му забраниле да трча поради операцијата на коленото, па тој ја открил оваа лесна, но ефикасна форма на вежбање. Ги истражил здравствените придобивки и решил да почне. Прво, тој завршил курс за да ги научи вистинските потези и побарал совет од експерт за да му ги  избере стаповите. Времето и напорот се исплателе. Денес, тој вежба два-три пати седмично во малата шума близу до неговиот дом и интензивно пешачи 8-10 километри, без никаков проблем. А што е уште поважно, честите болки во грбот и во долниот дел на грбот ги нема повеќе, и тој се чувствува многу поенергичен, па дури и лесно го откажа пушењето.

Нордиското пешачење е една од најефикасните форми на аеробни вежби (телото ја произведува потребната енергија за мускулно вежбање и внесува големи количини кислород при умерен напор). Овој спорт може да го практикуваат сите, во секое време. Со оваа интензивно, но лесно вежбање, не е можно да се презаморите. Дури и ако пешачите неколку километри со лесно темпо, ќе го вежбате речиси секој мускул во Вашето тело без да ги оптоварувате зглобовите. Еве неколку совети за да ја зголемите ефикасноста на вежбањето.

Совети за нордиски пешаци - почетници

• Пешачењето со два стапа можеби изгледа лесно, но пожелно е да добиете соодветна обука од професионалец за да го научите вистинскиот редослед на движењата.
• Стаповите се многу важни и прават голема разлика. Најдобро е да замолите совет од експерт да ги избере вистинските за Вас. Квалитетните стапови не се евтини, но помислете на нив како долгорочна инвестиција која сигурно ќе се исплати.
• Важно е да имате и соодветни патики. Нордиските патики за пешачење имаат жлебаст и зајакнат ѓон кој ги потпомага природните движења на стапалото.
• Секогаш загревајте се пред и растегнувајте се после вежбањето за да спречите повреди.
• Постепено зголемувајте го напорот. Откако ќе стекнете почетна кондиција, може да ги зголемите и брзината и растојанието.
• При подолги пешачења, со себе носете нешто за пиење за да ја надополните изгубената течност.
   

Одвојте малку време за себе и за Вашето здравје - изберете вежбање на отворено, наместо излежување на каучот. Вашето тело и срцето ќе бидат здрави ако ги одржувате. Не чекајте да дојде до проблем, па тогаш да почнете со здрав начин на живот.